Keluaran Pasal 30 Lik Yupu

\c 30 \s Siltong teleb ning uku dongonak, el si mesba ati, nyabuk yupu \p \v 1 Allah arye, Musa biti nyabuk. \p Na Allah arena ati, siltong teleb ning, uku dongonak el si ara mesba, kat yo el si ara, Akasia yo arye, memepnamlume. \v 2 Asiltong teleb ning, uku dongonak ara, el camg arye, kup-kup dana-dana kentinibuka memepnamlume. Tonda, aning el cang ap, el fala ap ara, dekuka neik toto uk, 45 sentimeter dekuka kentinipnamlume. Atonun uk tonda, abukni tikilin yo, el tinggi cang ara, 90 sentimeter dekuka kintinipnamlume. Winipmunce, siltong teleb ning uku dongonak ara, kup-kup sirya dum barye (segi empat) kintinipmamunyak nirya ara, sapi basam kisok tatce belalamla atonun ning, mouplum ning ara, binuka tabakuka deipmunyeba, atatce ap, mesba nong ap tonok kipnamlule. \p \v 3 Amerekeipmamunye ning, itam kup-kup dum barye sirya tam nirya ara, sapi basam kisok tatce atonun ubuka merekeipnamlum ning arye, tabakuka tonok kipnamlume. Winipmunce, el aning nirya deice ara, urasin teleb kat ning emas fia teleb ning aryuk, taplakdeipnamlume. Tonda, aning kup-kup nirya ara, dekna weik ning emas arye, urasin teleb ning, el si bingkai arye merekeipbikirye, kwanibuka ongopdongopnamlume. \v 4 Siltong teleb ning uku dongonak, el si mesba ati, memeplum ning, amutam dana-dana arye, fala yo dongona ati, cincin atonun ubuka, talin ning tupne dam bitinye atonun ubuka, deipmunce kentinipnamlume. Acincin ara, ara mesba talibuka bobana ati winipnamlume. Tonda, fala yo dongona ati, acincin atonun ning ara, urasin teleb ning el si bingkai kwanibuka ongopdongopmamunyak, amutam deipnamlume. \p \v 5 Talipnarye asiltong ning uku dongonak, talibuka bana ati, kat yo el si akasia aryuk dopnamnyake. Winibicop ura, ayo deice ara, dekna weik teleb ning, emas arye taplakdeipnamlume. \v 6 Asiltong teleb ning uku dongonak ati, kentinipdeiyamlum ning ara, Allah arye Musa biti, "Aning ara wininamlume, aning ara fia kum wininamlume," nyabuka, nyalin yupu nyapdeibukba, yo marikna pum arye libuka deiplum aik koproba, fia Teleb Aik pum tam binuka deipnamlume. Anyaik wilibuka lilina ati, cang butum aling lapkwetepmunyak bukni, aik koproba tam binuka deipnamlume. Tonda, ayo marikna pum, el buplan deice ara, ining ning obikirye, ining burubuka likinamakak, aning urasin tam, siltong teleb ning uku dongonak memepmamunye ning bobuka, asukum uk binuka deipnamlume. Winipminyeba, anyaik pum tam asukum uk, nap Imam deiyok nang ap epdananame. \p \v 7 Asum-asum nirya, Harun beretam talak arye, wesa laning upna kintinilina ati yanganamle talak ara, Harun el adip aryuk siltong teleb ning dam yalirye, uku dongonamle. \v 8 Beretam talak winipmalya atonun, sintam babye atonun, wesa laning upna lana ati yanganamle talak nirya ara, asiltong teleb ning dan dam yalirye, uku dongonamle. Aning ara atalak arye dipdongobuka, doyanamle talak nirya ara, afil nirya atonun donamlule. \v 9 Siltong teleb ning uku dongonak deice ara, siltong teleb ning uk uku dongonamlume. Yata yuk ning do nirya, aning deice ton, fia kum deilinamlume. Ara, yuk yala ining ning do, roti kwaning dana deiyok ning, terigu do, asiltong ning uku dongonak deice, fia kum deilinamlume. Tonda, aning atonun, na Allah arena ati, anggur mek babye amesba deice ara, fia kum dikililyanamlume. Amesba deice ara, siltong teleb ning uk, uku dongolyanganamlume. \p \v 10 Bukni, tonok keteng tamun noutamak, like tonok sum ton, Harun bira, ining ning oplirye, ining burubuka, asiltong ning uku dongonak, amesba el dana-dana tam tatce ning upmalyak deice, ining likeipnamlume. Ara talye kam un ning ona kum bukni, aining ara anggun Israel ninye ati, 'Nun malye unyap ning naminkipsilirye, kum daneipnamsil tenen, kam un ning obuka boyanamle talak, like tonok talak ara, aining dobuka, sapi basam kisok tatce atonun ning memebuka deiamicak deice, binuka likuka deilinamlume. Afil donamle ning ara, aketeng tamun, aketeng tamun nirya bukni, like tonok sum arye afil uk donamlule. Tonda, afil donamak ning ara, atalak arye dipdongobuka doyanamle talak babye, tuba donamake. Winibuka dobikiba, aning ap, afil dona ap ara, fia teleb uk unamlule. Winipminyop ura, na Allah Yahweh arye, 'Aning nirya ara fia teleb uk ulule. Malye ning ara, fia kum upmale,' tenipnirye, kanye deipnamsine. Allah arye Musa biti nyabuk. \s Allah Yahweh el si erena aik fil melina ati, yo bok arenamaka ati, nyabuk yupu \p \v 11 Allah el si Yahweh arye, Musa biti ayupu nyabuk. \p \v 12 'Israel yala ninye ara, yata ubuka wininyak do' tenen, anggun nirya nukmince, anggun si sekna fil dopnumunye talak nirya ara, Israel ninye nirya, sal babye, kilapu babye, anggunce, 'Nun nong dibipyak' tenen, anggun fununa ati, dekna yo bok ton, na Allah ati arenamninyake. Winipmunya deice arye, anggun nong nirya nukmince, anggun si seknamlum talak ara, weik kanye imun uk, anggun nong deice ton fia kum deipnamsine. \v 13 Israel ninye nukmince, sik si seknamlum talak ara, yata ninye do nirya, akunum nukikirye, sik si sekdobice nang ara, sik anang adip aryuk aning dekna ati, keil uang el si syikal arepnamake. Na si erena aik noutam arena ati, 'Akeil uang el ikin ara 20 geram nukuka arenamninyake nyabuka, akunum lak nyapdeipsiba wininyaka atonun ubuka, akeil uang syikal noutam ning uk (setengah syikal) arepnamnyake. Aning arenamniyak keil uang ara, na Allah Yahweh, na ning koprob ati, aning buluka deilinamniyake. \p \v 14 Israel ninye sik si sekna fil donamlum talak arye, akunum nuknamak nang ara, keteng tamun dua puluh tahun itam nang uk nuknamnyake. Winibuka nukicop ura, anggunda batakana kum adip aryuk yo bok keil uang el si siyakal buluka, na aik deilin ning ati, kentinibuka arelyanganamninyake. \v 15 Tonda, sik bona weik talin nang ara, keil uang yo bok fia weik tonun kum aremamlume. Atonun uk, anggun bona talina kum ninye babye, anggun nong ati dekna arenamak talak ara, mitik tonun arena kume. Sik bona weik talin nang babye, bona talina kum ninye babye atonun uk, keil uang el si syikal noutam ning uk buluka, nati arepnamake. Ara, 'Allah Yahweh arye nun malye unyap ning ati, wenebuka opsilyak tenen, anggun pununa ati, akeil uang arenamninyake nyabne. \p \v 16 Israel yala ninye nirya arye, bulupdeibice keil uang nirya ara, na si erena ati, ninye ap, na ap eldan aik pum tam boyamunce, na aik noutam un ning ap, anyaik fil dona ap atibuk, akeil uang dolonamlume. Aning nirya ara, anggun babye nong deken ning atibuk wininamake. Winibikirye, na Allah Yahweh ati arepnicop ura, adeice narye anggun Israel ninye nirya ati, wenebuka kum opnamsine. fia tuba tenisinirye melinamsine. Allah arye Musa biti nyabuk. \s "Mek deilin ning, perunggu fia teleb ning arye, dopnamlume," nyabuk yupu \p \v 17 Allah el si Yahweh arye, Musa biti ayupu nyabuk. \p \v 18 Mek deilin ning tonok ton, teleb kat ning perunggu deice arye memepnamlume. Winimunyop ura, el deice taplakan ning ara, perunggu aryuk, taplakdeipmunce memepnamlume. Akunum memebikcop ura, aning dobuka, Allah el si erena ati, ninye ap, el ap eldan aik otam, ining ning obuka uku dongona ati, keil yangabuka taplakdeipmunyak atam upliba, danatam binuka, amek makau delin ning, asukum uk deipnamlume. Amek makau ap, el deilina ap, akunum kentinibuka deibikcop ura, mek kwebuka amakau pum tam dikilongonamlume. \v 19 Adikilongonamlum mek ara, Harun ap, Harun el mapu nirya ap, sik cuk amek dopropbikirye, sik taruk ap, sik yan ap, teleb ubuka mek likinamake. \p \v 20 Allah na si erena ati, ninye ap, na ap eldan aik wekelbinukce talak babye, tonda, 'Allah arena ati, ining ning uku dongopnuyap tenen, ining ning obuka, na Allah Yahweh aren ning, uku dongona ati, kentinipdeibikak dam bobinukce talak ara, Harun ap, el mapu ap arye, sik yan ap, taruk ap ara, adip aryuk mek liknamnyake. Sik anang arye, aning winibikcop ura, narye sikti wenebuka opniba, kum dipnamake. 'Aning ara winipnamlume nyapdeipmakin yupu ara, Harun ap, elce deibuk mapu arye deibikiba, dadeipdanin banamak nang nirya ara, aning uk moubuka talibikirye, fia ati winipninbanamke. Aning ara kum bataknamake. Batakicop ura, wenebuka opniba, sik dipnamak ca. Allah arye Musa biti nyabuk. \s Aning ara, teleb kilina ati, teleb minyak mek deice arye likna ati, nyabuk yupu \p \v 22 Allah el si Yahweh arye, Musa biti nyabuk. \p \v 23 Winitalak ara, nintong fia teleb ning aning-aning nirya ara, tonok el si mur mekwem, el ikin ara, 6 kilo ap, tonda nintong fia teleb nyalul yo, el si ara kayu manis 3 kilo ap, tonda kwei nintong teleb nyalamle ning 3 kilo ap, tonda yo si teja yo, 6 kilo ap dobuka kentinipnamlume. \v 24 Winipmunyop ura, aning nirya ara, na si erena ati, tia doltane aik pum tam arena ati, Dekne keil uang el si syikal, winibuka ikin nuknamlume nyabuka lak nyapse touk, ateleb ning deknamlume. Tonda saitun yo duk teikikceba, el minyak mekwen, empat liter ton tabaknamlume. \p \v 25 Anintong teleb ning nirya akunum bulubuka kintinibicop ura, siltong teleb ning kintinina weik kel nang ati arepminyeba, aning nirya tabakukabikirye, likin minyak mekwen, fia teleb ning kintinipnamake. Winibikcop ura, aning ara ninye wibuka deipnirye, laka kina ati fil donalume. Alikinamak minyak mek ara, ara nintong teleb nyalamle ning merekmunce, kentinipdeipnamlume. Aminyak mek ara, na Allah ning uk winipnamnuluma anya arye, narye aning fia teleb ulinamne. Aminyak mek ara, 'Anang arye weik mambul fil donamak' tenen, ninye ebuka delin sum ara, sik kisok deice likilinamlume. Aning atonun, yata ning do nirya, 'Aning ara, Allah el ning uk unamle tenen, aminyak mekwen dobuka, aning deice ara, likeipnamlume. \p \v 26 Asiltong teleb minyak mek akunum moubuka deipmunyop ura, anggunce aning dobuka, Aning ara Allah el ning uk unamle tenen, na si erena ati, ninye ap, na ap eldana ati, tenda bola aik deice likdeipnamlume. Aning atonun, na Allah arye Musa biti, 'Sik Israel ninye ara, aning ara wininamake, aning ara fia kum wininamake nyapdeipse nyalin yupu dobuka, peti marikna yo pum tam dongopmunye ning, fia Teleb Aik noutam deipmunyop ura, ayo marikna deice, aminyak mek likdeipnamlume. \p \v 27 Tonda, Teleb Aik noutam deipmunye meja yo ap, ameja deice deiplum ning nirya ap, tonda wesa laning upna deiyok ap, aweisa deiyok deice ubuk ning nirya ap, el fil don ning ap, tonda anyaik pum tam siltong teleb ning uku dongonak mitik ning, el si mesba ap, akintinipdeipmalum ning deice nirya, aminyak mek likdeipnamlume. \v 28 Aning atonun, 'Allah arye nun malye ning naminkipsilirye, lyepnamsil tenen, ining ning opnirye, uku dongonak, el si mesba ap, aning deice delin ning ap, aning fil don ning aning-aning nirya ap ara, aminyak mek likdeipnamlume. Tonda, sik Imam nang arye, sik taruk ap, yan ap mek likna ati, mek kwebuka deilina ati kentinipdeiplumak ap, el talina ati kentinibuka deiplum ning ap nirya ara, asiltong teleb minyak mek arye likdeipnamlume. Winipnamluma deice arye, 'Aning nirya ara, Allah el ning koprob uk unamle tenen, winipnamlume. \p \v 29 'Aning nirya ara, Allah el ning koprob unamle tenen, afil doplum ning nirya ara, na ning atibuk kentinibuka deipnamnulume. Winimunyop ura, narye aning nirya teleb ubuka deipniba, fia teleb lek weiknye unamle. Ati ara, yata ning do nirya, aning el si mesba dam upnamle ning ara, teleb kurun uk upnamlule. Ara na Allah fia lek weiknye aulula ati nyabne. \v 30 Tonda, Harun ap, el mapu nirya ap, 'Allah el aik fum noutam fil talibuka donamaka ati, Allah el ning uk unamake tenen, sikti wibuka deipmince, ateleb minyak mekwen, sik kisok deice dikeipbikiba, Imam yala nang kibikirye, na fil fia donamake. \p \v 31 Tonda, anggun Israel yala ninye nirya kekena ati, nyapnamlyame, 'Yuk talak nirya ara, ateleb minyak mek ara, talye ning uk kum ulule. Ara Allah el ning uk ulule nyabuka lakak aryuk lak nyapnamlume. Na Allah atibuk fil donamnulume. Ara atalak arye dipdongobuka, dounamle keteng tamun nirya ara, ateleb minyak mek kenteneipnamlum ning ara, na ning uk unamalula anya arye, aning ara kum bataknamlume. \v 32 'Winibuka kintinipnamlume nyapkise ning ara, teleb minyak mekwen ara, talye-talye nang, anggun nong deice ara fia kum dikeipnamlyame. Tonda, 'Aminyak mek teleb upnamle tenen, 'Aning nirya bulubuka tabakmince, teleb minyak mek kentenipnamlume nyapkise minyak ara, yuk minyak mekwen ning ap arye, ateleb ning noutam ara, fia kum tabakanamlume. Na Allah arye aminyak mek ara, akunum teleb kipdeipniba, fia lek weik mek uk ulula ati nyapkine. Ati anggun nirya arye, Kume, aminyak mekwen ara, Allah el lek weik ning uk ulule tenenamlume. \p \v 33 Anintong teleb minyak mekwen, atonun mek kintinibuka deilinyak nang ap, tonda, Imam fil talibuka don nang yala nang kum bukni, yuk talye daunyak nang sik nong deice deipbicop ura, awinipmace nang ara, Israel ninye bona talina kum noutam arye dobuka, baitam inibuka dopkwetepnamlume. Aning ara fia minpola nyapsine. Awinipmace nang ara, na mapu koprob atonun fia kum unamnyake. Bataknirye wenebuka opnamne. Allah arye Musa biti nyabuk. \s Siltong teleb ning uku dongonak ati nyabuk yupu \p \v 34 Allah el si Yahweh arye, ayupu nyabuk ning ara, ayupu ton dukdongobuka, Musa biti ayupu ton nyabuk. Na arena ati, nintong teleb-teleb nyalamle ning, winibuka dobuka kentenipnamlume. Ara, Damar yo el ap, tonda, Lokan yo el bola ap, tonda, Rasamala yo el ap, tonda nintong fia teleb nyalamle ning, el si dupa ton dobuka kentinipnamlume. Aning-aning nirya, el ikin ara atonun uk nukuka, kentinideipnamlume. \v 35 Anintong fia teleb ning nirya arye tabakuka, uku dongon ning ati, siltong teleb nyana ati ning memepnamlume. Tonda, siltong teleb likna ati nin memebikcop ura, weik kel nang aryuk, aning kintipnamake. Aning akunum kintinibikcop ura, garam uwa ap tabaknamlume. 'Aning ara fia teleb, murni upnamle tenen, yuk ning ton fia kum tabaknamlume. Aning akunum memepmunyeba, narye teleb ubuka deipniba, aning fia teleb uk unamle. Winipliba anggunce, Kume, aning ara, fia lek weik ning ulula anya arye, Allah el ning uk unamllule tenenamlume. \p \v 36 'Winibuka kintinipnulyame nyapkise siltong teleb nyan ning nirya ara, akunum tabakuka kentinipmunyop ura, aning noutam arye ton wilibuka dobikirye, teikne ning arye teikinmamunye ani, uku kalum atonun akunum teleb uplyop ura, adip aryuk na ap, ninye ap eldana ati tenda butum aling bola arye doltane aik dam boyamunce, fia Teleb Aik weknamlume. Anyaik noutam ara, na Allah arye Musa biti, 'Aning ara wininamlume, aning ara fia kum wininamlume nyabuka, nyalin yupu nyapdeipse, Musa bira asekse yupu libuka deibuk marikna yo pum tam upmalyak ara, el urasin tam yan deipnamlume. Asukum ara, na ap sik Imam nang, sik deiyok nang ap, bulubikirye, yupu sisikinamake. Asiltong teleb ning ara, 'Aning ara Allah el ning uk ulula anya arye, fia lek weik ning ulule tenenamlume. \p \v 37 Asiltong fia teleb ning atonun ara, fia kum memepnamlume. Yata nang do nirya, 'Nun ning ton kintinibibirye, nun tenepmapye touk uku dongopnamabe fia kum tenenamake. Aning ara fia minpola nyapsine. Sik Israel yala ninye nirya arye, asiltong teleb ning ati, Kume, aning ara nuni Allah Yahweh, el ning uk ulula anya arye, fia teleb kurun ning unamlule tenenamlume. Nintong teleb nyalamle ning ati, atonun ubuka memenyak nang ara, na mapu koprob atonun fia kum unyake. \v 38 Yata nang do nirya, asiltong fia teleb nyana ati ning, atonun ubuka memenyak nang ara, na mapu koprob, atonun fia kum wininamake. Aning ara, anggun Israel yala ninye bona talina kum noutam arye, inibuka dopkwetepmamunyeba, narye amalye winibikce nang ara, wenebuka opnamne.